Stjórnin verður að sýna viðbrögð

„Engin lýðræðisleg stjórn getur sleppt því að svara jafn umfangsmiklum mótmælum og hafa verið í gangi,“ segir Silja Bára Ómarsdóttir, aðjúnkt við Háskóla Íslands. Hún segir ríkisstjórninni ýmsar leiðir færar til að bregðast við kröfum almennings.

Forsætisráðherra geti sagt af sér og í kjölfar þess rjúfi forseti þing og boði til kosninga. Ríkisstjórnin geti kallað minnihlutann til samstarfs og myndað þjóðstjórn. Önnur leið sé að mynda bráðabirgðastjórn sem sitji fram að boðuðum kosningum. Aðrir möguleikar geti falist í myndun neyðarstjórnar og/eða minnihlutastjórnar.

„Ef við setjum þetta í samhengi við Bandaríkin jafngilda mótmælin á þriðjudag því að tvær milljónir manna hefðu mótmælt fyrir utan þinghúsið. Ríkisstjórnin verður að bregðast við þessum þrýstingi.“ - hhs