Krafa um stjórnarslit og kosningar í vor

Harðri andstöðu við ríkisstjórnarsamstarfið var lýst á fjölmennum fundi Samfylkingarfélagsins í Reykjavík í gærkvöldi. Þingmenn jafnt sem almennir flokksmenn sögðu rétt að kjósa í vor.

Ágúst Ólafur Ágústsson, varaformaður Samfylkingarinnar, og Lúðvík Bergvinsson þingflokksformaður vilja báðir að kosið verði í vor. Raunar er meirihluti þingflokksins þeirrar skoðunar.

Geir H. Haarde forsætisráðherra er á öðru máli. Hann telur mikið glapræði að efna til kosninga nú enda standi ríkisstjórnin í stórræðum. Geir segir Ingibjörgu Sólrúnu Gísladóttur utanríkisráðherra hafa staðfest við sig í símtali í gær að stjórnarsamstarf Sjálfstæðisflokks og Samfylkingarinnar væri ekki í hættu.

Á fundi þingflokks Sjálfstæðisflokksins í gær voru margar hliðar pólitíska og þjóðfélagslega ástandsins ræddar. Þótt þingmenn væru sammála um að óábyrgt væri að boða til kosninga nú eru sumir þeirra þeirrar skoðunar að nauðsynlegt sé að tímasetja kosningar. Með því væri mögulegt að koma á ró í samfélaginu. Í Kastljósi Sjónvarpsins í gærkvöldi sagði Geir ekkert mæla gegn því að kjósa næsta vetur.

Geir hefur verið gagnrýndur af samflokksmönnum sínum fyrir að beita sér ekki fyrir breytingum á yfirstjórn Seðlabanka og Fjármálaeftirlits.

Á fundi Samfylkingarfélagsins í Reykjavík í gærkvöldi sagði Lúðvík Bergvinsson nauðsynlegt að gera mannabreytingar í stofnunum tveimur.

Formaður Framsóknarflokksins, Sigmundur Davíð Gunnlaugsson, sagði í gær flokk sinn reiðubúinn að verja minnihlutastjórn Samfylkingarinnar og Vinstri grænna falli, gegn því að efnt verði til kosninga fyrir apríllok. Samfylkingin hefur ekki áhuga á slíku stjórnarsamstarfi en Steingrímur J. Sigfússon fagnaði hugmyndinni.

Áfram var mótmælt af krafti við Alþingi í gær þar sem talið er að vel á þriðja þúsund mótmælendur hafi komið saman.

Mótmælendur tóku sér einnig stöðu við Stjórnarráðið þar sem Geir H. Haarde, forsætisráðherra þurfti aðstoð lögreglu við að komast frá Stjórnarráðinu.

Á níunda tímanum í gærkvöldi kom hópur mótmælenda saman við Þjóðleikhúsið þar sem Samfylkingarfélagið í Reykjavík fundaði um framtíð stjórnarsamstarfsins.

Rætt verður um stöðu efnahagsmála og horfur á vinnumarkaði á þingfundi sem hefst klukkan hálf ellefu í dag.

sjá síður 4, 6, 8 og 10 / - bþs,