Þjóðstjórn ólíkleg

Þjóðstjórn undir forystu Sjálfstæðisflokks er hæpin að mati Einars Mar Þórðarsonar stjórnmálafræðings.

Geir H Haarde fráfarandi forsætisráðherra sagði á blaðamannafundi nú í dag að ein meginástæða þess að slitnaði upp úr ríkisstjórnarsamstarfinu hafi verið sú krafa Samfylkingarinnar að flokkurinn tæki við forystu í ríkisstjórn. Hann sagði jafnframt að ef mynduð yrði þjóðstjórn yrði hún undir forystu Sjálfstæðisflokks.

Einar segir að fyrst að flokkarnir náðu ekki saman um áframhaldandi ríkisstjórnarsamstarf sé ólíklegt að Samfylking sætti sig við þjóðstjórn undir forystu Sjálfstæðisflokks.

Einar telur sennilegasta kostinn í stöðunni vera þann að Vinstri grænir og Samfylking myndi ríkisstjórn sem er varin vantrausti af Framsókn. Þó að formenn flokkanna kannist ekki við það að hafa rætt það samstarf, þá sé augljóst að þreifingar hafi verið í gangi. „Það virðist líklegasti möguleikinn eins og staðan er núna," segir Einar. „En vissulega eiga þessir flokkar eftir að tala saman og fara betur yfir málin."