Byggja netþjónabú í Reykjanesbæ

Framkvæmdir eru hafnar við netþjónabú íslensk-bandaríska fyrirtækisins Verne Holding á Keflavíkurflugvelli. Búið er að rífa innan úr 25 þúsund fermetra skemmum á gamla varnar­svæðinu þannig að húsnæðið er nánast eingöngu fokhelt og er verið að grafa grunn fyrir varaaflsstöðar. Íslenskir aðalverktakar sjá um framkvæmdirnar. Þá hefur Hitaveita Suðurnesja verið að færa til lagnir á svæðinu.

Búið er að samþykkja deiliskipulag á svæðinu og er nú verið að grafa fyrir varaaflstöðvum. Allt hefur verið rifið innan úr tveimur skemmum sem nota á í fyrsta áfanga. Verne Holding hefur tækifæri til að stækka við húsnæðið í síðari áföngum.

Gríðarmiklum búnaði verður komið fyrir inni í húsunum. Skemmurnar eiga að hýsa öflug kæli- og varaaflskerfi, tölvu­búnað, netþjóna og gagnageymslur fyrir alþjóðlega stórnotendur. Verne Holding mun útvega þeim örugga aðstöðu, orku og nettengingar. Meðal þeirra sem gætu notfært sér þessa þjónustu eru netveitur, fjármálafyrirtæki, smásölufyrirtæki og kvikmyndaver.

Egill Sigmundsson, forstöðumaður hjá Hitaveitu Suðurnesja, segir að lóð Verne nái yfir gamlar götur. Undir þessum götum séu lagnir og þær hafi starfsmenn hitaveitunnar þurft að færa út fyrir lóð Verne. Í fyrstu áföngum muni Verne nýta gömlu lagnirnar.

Erfitt er að fá upplýsingar um framkvæmdir Verne Group og framgang þeirra hér á landi, til dæmis það hversu margir starfsmenn koma að framkvæmdunum. Lisa Rhodes, talsmaður Verne Global í Bandaríkjunum, er sú eina sem má gefa upplýsingar. Hún staðfestir að framkvæmdirnar standi yfir en vill ekkert segja að öðru leyti.

Verne kaupir 25 megavött af rafmagni af Lands­virkjun en félagið hefur samið við Farice um flutnings­rými á Farice-1-sæstrengnum og Danice-strengnum, sem á að leggja, á samtals 160 gígabit á sekúndu.

Fjárfesting félagsins hér á landi næstu fimm árin nemur tuttugu milljörðum króna. Stefnt er að því að starfsemi hefjist sumarið 2010 og er vonast til að 100 störf skapist. Verne Holding er í eigu Novators, fjárfestingarfélags Björgólfs Thors Björgólfssonar, og bandaríska fjárfestingarsjóðsins General Catalyst Partners.

ghs@frettabladid.is