Sendiherra Íslands í Kína tekinn á teppið

Lillý Valgerður Pétursdóttir skrifar 3. júní 2009 12:00

Sendiherra Íslendinga í Kína var kallaður á fund í kínverska utanríkisráðuneytinu gær vegna heimsóknar Dalai Lama hingað til lands.

Kínversk stjórnvöld kölluðu Gunnar Snorra Gunnarsson sendiherra Íslands á sinn fund í Peking í gær vegna heimsóknar Dalai Lama. Í samtali við fréttastofu sagði Urður Gunnarsdóttir, upplýsingafulltrúi utanríkisráðuneytisins, að á fundinum hefðu Kínverjar lýst yfir áhyggjum af því að heimsókn Dalai Lama hefði á sér full opinberan blæ þar sem trúarleiðtoginn væri farinn að hitta ráðherra.

Kínverjar komu einnig óánægju sinni með heimsóknina á framfæri hér á landi en Zhang Keyuan, kínverski sendiherrann á Íslandi, fór í gær á fund ráðuneytisstjóra utanríkisráðuneytisins til að koma á framfæri skoðun kínverskra stjórnvalda og sendiráðsins á heimsókn Dalai Lama og fundum hans með íslenskum ráðamönnum.

Tvennum sögum fer af því hvort að heimsókn Dalai Lama og móttökur Íslendinga hafi það í för með sér að kínverski sendiherrann verði kallaður heim. Fréttastofa Ríkisútvarpsins sagði í gær að hún hefði heimildir fyrir því að kalla ætti sendiherrann heim vegna málsins. Í samtali við fréttastofu í gær sagði sendiherrann sjálfur það algjöra vitleysu og að hann væri ekki á förum fram á landinu.

Urður Gunnarsdóttir hjá utanríkisráðuneytinu vildi ekki tjá sig um málið í morgun en sagði þó að henni væri ekki kunnugt um það að Kínverjar hafi rætt það við íslenska sendiherrann í Kína að kalla sendiherra sinn hér á landi heim vegna málsins.

Þrátt fyrir ítrekaðar tilraunir hefur ekki náðst í kínverska sendiherrann í morgun. Ekki hefur heldur tekist að fá formleg svör vegna málsins hjá utanríkisráðuneytinu í Kína.

Tengdar fréttir

Vísar á kínversk stjórnvöld

„Þetta er mál Kínverja og við vitum ekkert meira um það og staðfestum ekkert til eða frá," segir Kristján Guy Burgess, aðstoðarmaður Össurar Skarphéðinssonar, aðspurður hvort að utanríkisráðuneytinu eða utanríkisráðherra hafi borist tilkynning um að Kínverjar hafi eða ætli að kalla sendiherra sinn hér á landi heim.

3. júní 2009 11:31

Formleg tilkynning hefur ekki borist frá Kínverjum

Utanríkisráðuneytinu hefur ekki borist tilkynning frá kínverska sendiráðinu um að Kínverjar hafi eða ætli að kalla sendiherra sinn hér á landi heim. Þetta segir Urður Gunnarsdóttir, upplýsingafulltrúi ráðuneytisins.

3. júní 2009 09:56

Sendiherra Kína ekki á förum

Sendiherra Kína, Zhang Keyuan, segir að það sé algerlega fráleitt að hann hafi verið kallaður heim til Kína vegna heimsóknar Dalai Lama til Íslands.

2. júní 2009 18:26

Harkaleg viðbrögð

Steingrímur J. Sigfússon fjármálaráðherra segir enn óljóst hvað felst í því að Kínverjar hafi ákveðið að kalla sendiherra sinn heim frá Íslandi vegna komu Dalai Lama, trúarleiðtoga Tíbeta. Hann segist lítið hafa frétt af málinu þótt hann hafi heyrt það í gærkvöldi að sendiherrann hafi sjálfur upplýst að hann væri á heimleið. Sendiherrann neitaði því í samtali við fréttastofu í gærkvöldi í framhaldi af því að Ríkisútvarpið greindi frá því að hann væri á heimleið.

3. júní 2009 08:24

Ráðamenn hissa kalli Kínverjar sendiherrann heim

„Ég er hissa á því ef Kínverjar slíti eða dragi úr stjórnmálaasmskiptum vegna heimsóknar Dalai Lama," segir Steingrímur J. Sigfússon í viðtali við RÚV vegna fréttar Ríkisútvarpsins af því að Kínverjar hafi kallað kínverska sendiherrann heim vegna málsins.

2. júní 2009 22:09