Ráðherrar funda með Dalai Lama

2. júní 2009 13:12

Fundur tveggja ráðherra og tveggja þingflokksformanna með Dalai Lama hófst á Hilton Reykjavík Nordica klukkan 13 en forystumenn ríkisstjórnarinnar hafa sætt gagnrýni fyrir að eiga ekki fund með trúarleiðtoganum á meðan að hann dvelur hér á landi.

Fundinn á Nordica sitja auk Dalai Lama Ögmundur Jónasson, heilbrigðisráðherra, Katrín Júlíusdóttir, iðnaðarráðherra, Birgitta Jónsdóttir, þingflokksformaður Borgarahreyfingarinnar, og Björgvin G. Sigurðsson, þingflokksformaður Samfylkingarinnar.

Trúarleiðtoginn mun á eftir hitta Ástu Ragnheiði Jóhannesdóttur, forseta Alþingis, og þá mun hann eiga fund með þingmönnum utanríkismálanefndar.

Ráðherrarnir Árni Páll Árnason og Svandís Svavarsdóttir mættu í samtrúarlega friðarstund í Hallgrímskirkju í gær þar sem Dalai Lama flutti ávarp.

Troðfullt var út af dyrum í morgun þegar trúarleiðtoginn flutti erindi í Hátíðarsal Háskóla Íslands.

Tengdar fréttir

Dalai Lama heimsækir Háskóla Íslands

Dalai Lama, andlegur leiðtogi Tíbeta sem verið hefur í útlegð í hálfa öld, heimsækir Háskóla Íslands í dag í boði rektors og Hugvísindasviðs skólans þar sem hann mun eiga samverustund með stúdentum og starfsfólki skólans.

2. júní 2009 09:30

Hitti Dalai Lama fyrir nær hálfri öld

Sigurður A. Magnússon rithöfundur vonast til þess að endurfundir verði með honum og Dalai Lama en þeir hittust árið 1960 í Efra Dharamsala á Indlandi. Þá var Dalai Lama 25 ára og hafði verið eitt ár í útlegðinni sem hófst þegar Kínverjar brutu á bak aftur uppreisn Tíbeta. Sú uppreisn hafði staðið yfir í níu ár, eða frá því að Kínverjar hernámu landið árið 1950.

2. júní 2009 04:00

Dalai Lama trekkti að í Háskólanum

Dalai Lama, friðarverðlaunahafi Nóbels, heimsótti Háskóla Íslands í morgun og flutti erindi í Hátíðasalnum í boði rektors Háskólans og Hugvísindasviðs HÍ. Mjög létt var yfir samkomunni og hlógu áheyrendur margsinnis dátt og innilega með Dalai Lama að því er fram kemur í tilkynningu frá skólanum Kristín Ingólfsdóttir, rektor Háskóla Íslands, bauð Dalai Lama velkominn og sagði í máli sínu að það væri skólanum afar mikill heiður að fá hann í heimsókn. Kristín sagði að heimsóknin væri á hárréttum tíma fyrir Íslendinga þar sem hér væri verið að endurhugsa siðferðileg gildi samfélagsins.

2. júní 2009 12:08

Mest lesið

Fleiri fréttir