Barðastrandarræningjum líklegast sleppt úr haldi

Ólíklegt er að farið verði fram á áframhaldandi gæsluvarðald yfir Barðarstrandarræningjunum svokölluðu. Gæsluvarðhald yfir mönnunum rennur út í dag en þeir hafa verið í gæsluvarðhaldi frá 27. maí.

Mennirnir brutust inn til manns á áttræðisaldri mánudagskvöldið 25. maí en maðurinn er búsettur að Barðaströnd á Seltjarnarnesi. Þegar húsráðandinn kom heim heyrði hann umgang á efri hæð hússins. Stuttu síðar mætti hann manni sem sló hann í andlitið, batt hann á höndum og fótum með límbandi.

Ómar Smári Ármannsson, aðstoðaryfirlögregluþjónn lögreglunnar á höfuðborgarsvæðinu, reiknar ekki með því að farið verði fram á áframhaldandi gæsluvarðhald yfir mönnunum sem eru báðir tvítugir.

Ránið á Barðaströnd var annað ránið á skömmum tíma þar sem ráðist var á húsráðendur og þeim haldið í gíslingu. Fyrra ránið var á Arnarsnesi þar sem ráðist var á eldri hjón og þeim haldið í gíslingu og meðal annars klippt á símalínur. Aðilar þess máls eru hinsvegar í gæsluvarðhaldi til 16. júní.

Ástæða þess að gæsluvarðhald í því máli er lengra en í Barðarstrandarmálinu er að sögn Ómars sú að málin eru í eðli sínu ólík. Einna helst vegna þess að í málinu á Arnarnesi var það ásetningur ræningjanna að ráðast á húsráðendur. Í Barðarstrandarmálinu hafi það hinsvegar ekki verið ætlunin, heldur hafi húsráðandi komið heim ræningjunum að óvörum.

Þriðji maðurinn var einnig handtekinn í tengslum við ránið að Barðaströnd en honum sleppt fljótlega þar sem hann var einungis talinn geta veitt upplýsingar um ránið en ekki tekið þátt í því. Sami maður braust hinsvegar inn á heimili í Lækjarhvammi í Hafnarfirði daginn eftir að hann losnaði úr haldi vegna Barðarstrandarránsins. Þar réðist hann á 17 ára pilt sem náði að komast undan á hlaupum meðan ræningjarnir athöfnuðu sig.