Vísar á kínversk stjórnvöld

Magnús Már Guðmundsson skrifar 3. júní 2009 11:31

Kristján Guy Burgess, aðstoðarmaður Össurar Skarphéðinssonar utanríkisráðherra. Mynd/Stefán Karlsson

„Þetta er mál Kínverja og við vitum ekkert meira um það og staðfestum ekkert til eða frá," segir Kristján Guy Burgess, aðstoðarmaður Össurar Skarphéðinssonar, aðspurður hvort að utanríkisráðuneytinu eða utanríkisráðherra hafi borist tilkynning um að Kínverjar hafi eða ætli að kalla sendiherra sinn hér á landi heim.

Fréttir af málinu hafa verið óljósar. Fullyrt var í fréttum Ríkisútvarpsins í gær og Fréttablaðinu í dag að sendiherrann hafi verið kallaður heim vegna komu Dalai Lama, trúarleiðtoga Tíbeta, til Íslands.

Sjálfur sagði sendiherrann, Zhang Keyuan, í samtali við fréttastofu í gær að það væri algerlega fráleitt að hann hafi verið kallaður heim til Kína vegna heimsóknar Dalai Lama til landsins.

„Þetta er mál sem kínversk stjórnvöld verða að svara fyrir," segir Kristján.

Ekki hefur náðst í kínverska sendiherrann eða sendiráðið í morgun þrátt fyrir ítrekaðar tilraunir.

Tengdar fréttir

Formleg tilkynning hefur ekki borist frá Kínverjum

Utanríkisráðuneytinu hefur ekki borist tilkynning frá kínverska sendiráðinu um að Kínverjar hafi eða ætli að kalla sendiherra sinn hér á landi heim. Þetta segir Urður Gunnarsdóttir, upplýsingafulltrúi ráðuneytisins.

3. júní 2009 09:56

Sendiherra Kína ekki á förum

Sendiherra Kína, Zhang Keyuan, segir að það sé algerlega fráleitt að hann hafi verið kallaður heim til Kína vegna heimsóknar Dalai Lama til Íslands.

2. júní 2009 18:26

Harkaleg viðbrögð

Steingrímur J. Sigfússon fjármálaráðherra segir enn óljóst hvað felst í því að Kínverjar hafi ákveðið að kalla sendiherra sinn heim frá Íslandi vegna komu Dalai Lama, trúarleiðtoga Tíbeta. Hann segist lítið hafa frétt af málinu þótt hann hafi heyrt það í gærkvöldi að sendiherrann hafi sjálfur upplýst að hann væri á heimleið. Sendiherrann neitaði því í samtali við fréttastofu í gærkvöldi í framhaldi af því að Ríkisútvarpið greindi frá því að hann væri á heimleið.

3. júní 2009 08:24

Helstu ráðamenn fjarri Dalai Lama

Sendiherra Kína á Íslandi lýsti í gær óánægju ríkisstjórnar sinnar með fundi íslenskra ráðamanna með Dalai Lama, leiðtoga Tíbeta. Fjórir ráðherrar og rúmlega tíu alþingismenn hittu Dalai Lama í gær og fyrradag.

3. júní 2009 04:15

Dalai Lama í þinghúsinu

Dalai Lama hitti í dag Ástu Ragnheiði Jóhannesdóttir, forseta Alþingis, í þinghúsinu en hann mun funda með þingmönnum utanríkismálanefndar.

2. júní 2009 14:05

Ráðamenn hissa kalli Kínverjar sendiherrann heim

„Ég er hissa á því ef Kínverjar slíti eða dragi úr stjórnmálaasmskiptum vegna heimsóknar Dalai Lama," segir Steingrímur J. Sigfússon í viðtali við RÚV vegna fréttar Ríkisútvarpsins af því að Kínverjar hafi kallað kínverska sendiherrann heim vegna málsins.

2. júní 2009 22:09