Helstu ráðamenn fjarri Dalai Lama

Sendiherra Kína á Íslandi lýsti í gær óánægju ríkis­stjórnar sinnar með fundi íslenskra ráðamanna með Dalai Lama, leiðtoga Tíbeta.

Fjórir ráðherrar og rúmlega tíu alþingismenn hittu Dalai Lama í gær og fyrradag.

Áratuga deilur Kínverja og Tíbeta um yfirráð yfir Tíbet hafa verið harkalegar og á stundum blóðugar. Dalai Lama er tals­maður þess að Tíbetar fái sjálfsstjórn en kínversk stjórnvöld vilja fara með full yfirráð yfir Tíbet. Samskipti þjóðanna eru afar viðkvæm og andæfa kínversk stjórnvöld kröftuglega í hvert sinn sem Dalai Lama hittir erlenda þjóðarleiðtoga eða ráðamenn.

Sú staðreynd að hvorki forsætis- né utanríkisráðherra né heldur forseti Íslands hafi séð sér fært að hitta Dalai Lama í Íslandsheimsókninni hefur vakið athygli. „Það er nefnilega neyðarlegt að æðstu embættismenn þjóðarinnar komi sér hjá því að hitta friðarhöfðingjann,“ skrifar Birgitta Jónsdóttir, alþingismaður og formaður Vina Tíbets, til dæmis á vef sinn.

Ólafur Ragnar Grímsson, forseti Íslands, fundaði með fyrrverandi sendiherra Kína á Íslandi á laugardag, degi fyrir komu Dalai Lama til landsins.

Tilviljun réði því að fundinn bar upp svo skömmu fyrir komu tíbetska leiðtogans.

„Það hittist svona á,“ segir Örnólfur Thorsson forsetaritari. Fundurinn hafi ekki tengst komu Dalai Lama til Íslands og málefni Tíbet ekki komið til umræðu. Á heimasíðu forsetaembættisins segir að efni fundarins hafi verið

„margvísleg tækifæri til að auka samvinnu Íslands og Kína á sviðum menningar, vísinda og viðskipta“.

Sendiherrann fyrrverandi, Wang Ronghua, gegndi hér störfum árin 1998-2002. Hann flutti fyrirlestur í Háskóla Íslands á fimmtudag um söguleg kínversk gagnasöfn.

Samkvæmt upplýsingum Fréttablaðsins starfar sendiherrann fyrrverandi nú fyrir írskt markaðsrannsóknafyrirtæki í Kína.

Ólafur Ragnar fór á sunnudag til Kýpur til að vera við Smáþjóðaleikana sem hófust með setningarathöfn á mánudag.

Viðstaddir voru leiðtogar allra þátttökuríkja.

Langt er um liðið síðan Ólafur Ragnar þekktist boð Íþrótta- og Ólympíusambandsins um að dvelja með íslenska íþróttafólkinu á Kýpur.

Ekki kom til álita að endurskoða þá ákvörðun.

Össur Skarphéðinsson utanríkisráðherra er á Möltu þar sem hann ræðir við þarlenda ráðherra um veru ríkisins í Evrópusambandinu.

Fram kom í gær að Jóhanna Sigurðardóttir forsætisráðherra væri úti á landi fyrri part dags og gæti því ekki hitt Dalai Lama. Seinni partinn og fram á kvöld sat hún stífa fundi.

Upplýst var opinberlega um fyrirhugaða komu Dalai Lama hingað til lands 9. febrúar.

bjorn@frettabladid.is