Tveir milljarðar greiddir út í dag vegna bóta

Vinnumálastofnun greiðir út tæpa tvo milljarða í atvinnuleysistryggingar í dag til um 14.000 einstaklinga. Greitt er fyrir tímabilið 20. janúar til 19. febrúar 2009. Fyrir mánuði síðan greiddi stofnunin atvinnuleysistryggingar til um 9500 einstaklinga.

Á vef stofnunarinnar er vakinn athygli á því að þar sem umfangið er óvenju mikið þá mun það taka fram eftir degi fyrir stofnunina og banka að koma þessum greiðslum inn á bankareikninga. Umækjendur um atvinnuleysisbætur eru beðnir um að sýna því skilning.

Atvinnulausum heldur áfram að fjölga á nýju ári og á vef Vinnumálastofnunnar eru nú 16.411 skráðir atvinnulausir. Í lok síðasta mánaðar voru 13.280 skráðir án atvinnu og hefur þeim því fjölgað um 3131 á mánuði.

10.444 karlar eru skráðir án atvinnu og 5967 konur.