Alþingishúsið skemmt fyrir á annan tug milljóna

Það sem sparast átti í viðhaldi Alþingishússins á árinu til að mæta kreppunni mun gufa upp vegna kostnaðar við skemmdarverk síðustu mánaða. Kostnaður við að lagfæra, hreinsa og gera við Alþingi eftir grjót- og eggjakast undanfarið verður á annan tug milljóna króna.

Þegar kreppan skall á og skuldir ríkisins tóku að hrannast upp þurfti að endurskoða fjárlögin og voru menn þá með alla anga úti til að skera niður á sem flestum sviðum. Meðal annars var ákveðið draga úr viðhaldi á Alþingishúsinu við Austurvöll og endurnýjun tækjabúnaðar innanhúss.

Samtals var áætlað að með þessu myndi ríkið ná að spara sér um 20 milljónir króna í útgjöldum á árinu. Nú lítur hins vegar út fyrir að sparnaður í viðhaldi hússins muni að engu verða vegna þeirra skemmda sem urðu á Alþingishúsinu í mótmælunum undanfarnar vikur.

Helgi Bernódusson skrifstofustjóri Alþingis sagði í samtali við fréttastofu í morgun að fyrirsjáanlegt sé að beinn útlagður kostnaður Alþingis vegna viðgerða og þrifa á húsinu í mótmælunum verði um 12 milljónir króna.

Þær skipta tugum rúðurnar sem hafa brotnað, táragasnóttina miklu fyrir hálfri annarri viku brotnuðu t.d. 30 rúður og aðaldyr þingskálans, sem er úr dýru gleri, brotnaði tvívegis, tvö kvöld í röð. Rúðuskiptin verða líklega dýrasti liðurinn en eins hefur verið dýrt að kalla út menn til að þrífa húsið með háþrýstidælum.