Birtíngur hótar að kæra Vilhjálm til siðanefndar

Framkvæmdastjóri útgáfufélagsins Birtíngs, Elín G. Ragnarsdóttir, vill að lögmaðurinn Vilhjálmur H. Vilhjálmsson biðji blaðamenn sem starfa hjá útgáfunni afsökunar á þeim orðum sínum að þeir séu síbrotamenn á sviði ærumeiðinga og annarra brota á prentlögum. Elín hótar því í fréttatilkynningu að kæra ella Vilhjálm til siðanefndar lögmannafélagsins fyrir ýmis brot.

Í Fréttablaðinu í gær var greint frá fyrirhugaðri stefnu fjölskyldu úr Sandgerði á hendur ritstjóra Vikunnar, vegna ummæla viðmælanda Vikunnar um fjölskylduföðurinn og dóttur hans. Vilhjálmur rekur málið og sagðist meðal annars ætla að byggja á því að Birtíngur og starfsfólk útgáfunnar væru síbrotamenn á sviði ærumeiðinga og annarra brota á lögum um prentrétt.

Í tilkynningunni frá Elínu segir að enginn starfsmaður Birtíngs hafi verið dæmdur tvisvar eða oftar fyrir meiðyrði í starfi sínu hjá félaginu. Því sé ósvífni að kalla þá síbrotamenn.

Þá segir einnig að Vilhjálmur hafi ítrekað gerst brotlegur við siðareglur lögmannafélagsins, meðal annars með því að láta fyrirfarast að bjóða sættir áður en stefnt er. Biðjist Vilhjálmur ekki afsökunar hljóti að koma til álita að siðanefnd lögmannafélagsins fái að taka afstöðu til þess hvort Vilhjálmur sé sjálfur síbrotamaður.

Vilhjálmur segir að honum hafi ekki borist nein krafa um afsökunarbeiðni frá Birtíngi og geti því að svo stöddu ekki tekið afstöðu til málsins. Hins vegar hafi hann ekkert sagt við Fréttablaðið í gær sem hann geti ekki staðið við. „Ég hef kannski misskilið eitthvað. Ég hélt að það væri Birtíngur sem skuldaði skjólstæðingum mínum afsökunarbeiðni," segir hann og vísar að öðru leyti í grein sem hann birtir í Fréttablaðinu í dag.

- sh