Björgunarsveitir leita Aldísar á morgun

Aldís Westergren, konan sem lögreglan hefur leitað að undanförnu, er enn ekki fundin. Víðtæk leit stóð yfir að Aldísi um helgina, en hún bar engan árangur. Björgunarsveitir hafa aðstoðað lögreglu við leitina og hafa þær notað bæði kafara og leitarhunda. Meðal annars hefur verið leitað við Kópavogshöfn, í Fossvogi og við Reynisvatn og í nágrenni við heimili Aldísar.

Samkvæmt upplýsingum frá Ólöfu Snæhólm Baldursdóttur, upplýsingafulltrúa Slysavarnarfélagsins Landsbjargar, hafa björgunarsveitir ekki tekið þátt í leit að Aldísi undanfarna tvo daga. Hins vegar hafa allar sveitir á höfuðborgarsvæðinu verið kallaðar út til leitar eftir hádegi á morgun.

Síðast er vitað um ferðir Aldísar við Gvendargeisla í Grafarholti í Reykjavík þriðjudaginn 24. febrúar. Þeir sem geta gefið upplýsingar um ferðir Aldísar eru vinsamlegast beðnir um að hafa samband við lögregluna í síma 444-1100.