Kúgaðar konur fastar í skuldaklafa

Bágt efnahagsástand veldur því að fleiri konur en áður ákveða að búa áfram við ofbeldi í stað þess að skilja við maka sinn. Þær eru fastar í skuldaklafa, segir framkvæmdastýra Kvennaathvarfsins.

Erlendar rannsóknar sýna að heimilisofbeldi eykst í erfiðu árferði. Ekki er að sjá að niðursveiflan í efnahagslífinu hafi haft þau áhrif hér á landi enn sem komið er í það minnsta, en komur á neyðarmóttöku á Landspítala á síðasta ári vegna ofbeldis á heimili voru um eitt hundrað, sem er svipað og árið áður. Sveiflur í aðsókn í Kvennaathvarfið eru vel þekktar og reynist oft erfitt að útskýra þær, en síðustu vikur hefur verið rólegt þar.

„Fyrstu mánuðina eftir bankahrunið fengum við aftur á móti stærri hópa kvenna en nokkru sinni áður. Ekki fengið svo stóra hópa lengi," segir Sigþrúður Guðmundsdóttir, framkvæmdastýra samtaka um Kvennaathvarf.

Alltaf reynist konum erfitt að slíta ofbeldissamböndum, en það er til marks um efnahagsástandið að sífellt fleiri sjá skilnað sem óyfirstíganlega hindrun.

„Við sjáum stærra hlutfall kvenna fara aftur heim í óbreyttar aðstæður sem er áhyggjuefni og við sjáum fleiri konur hafa mjög miklar áhyggjur af því að geta ekki spjarað sig án maka síns utan hjónabandsins vegna mikilla skulda eða óseljanlegra eigna."

Þá er mikil aukning í viðtölum, þar sem konur leita sér stuðnings og ráðgjafar án þess að koma til dvalar, og skal bent á að sú þjónusta er endurgjaldslaus. Og samsetning hópsins hefur breyst.

„Við sjáum meira af íslenskum konum og minna af erlendum konum. Sem er þróun sem hefur verið akkúrat öfug undanfarin ár," segir Sigþrúður.

Starfsfólk reynir að geta sér til um hvað veldur. „Fjölgun íslenskra kvenna skýrum við með því að konur sem áður höfðu í önnur hús að venda þurftu ekki á þjónustu athvarfsins að halda til að slíta sambúð, en hafi það ekki lengur og leiti þess vegna í Kvennaathvarfið. Það af hverju erlendum konum hefur fækkað eigum við erfitt með að skýra."