Fylgi Samfylkingar hrynur

Fylgi Samfylkingar hrynur í nýrri skoðanakönnun Fréttablaðsins. Einungis 19,2 prósent segjast styðja flokkinn og hefur fylgið ekki verið minna í tvö ár.

Sjálfstæðisflokkur heldur áfram að dala og hefur 22,1 prósent fylgi. Framsókn rís hratt og segjast nú 16,8 prósent styðja flokkinn. Fylgið hefur ekki mælst meira í rúm fimm ár. Vinstri græn rísa einnig og hafa 32,6 prósent fylgi. Frjálslyndir nánast standa í stað með 3,7 prósent fylgi.

Einungis 20,3 prósent styðja nú ríkisstjórnina og hefur stuðningurinn aldrei mælst minni.

Flestir, eða 45,1 prósent vilja þjóðstjórn fram að næstu kosningum. Fjórðungur vill að núverandi ríkisstjórn haldi áfram þar til kosið er, en 18,2 prósent vilja stjórn Samfylkingar og Vinstri grænna, með stuðningi Framsóknarflokks.