Innlent

Fánagerðin á Langanesi eflist

Fánarnir á forsetabílinn og fánar IDOL-keppninnar á Stöð 2 eiga það sammerkt að koma frá Þórshöfn á Langanesi en þar er stærsta fánagerð á Íslandi. Gengisfall krónunnar hefur styrkt samkeppnisstöðuna gagnvart innflutningi.

Þótt starfsmennirnir séu aðeins fjórir hefur Fánasmiðjan álíka mikla þýðingu fyrir 350 manna byggð eins og 1400 manna fyrirtæki fyrir höfuðborgina. Fjölskylda á Þórshöfn, hjónin Erla Jóhannsdóttir og Konráð Jóhannsson, ásamt dóttur þeirra Karen, keyptu fyrirtækið frá Reykjavík fyrir fimm árum.

Þau segjast framleiða yfir 30 kílómetra af fánum á ári, jafn litla fána sem stóra, þjóðfána sem aðra fána. Hér er verið að sauma nýja fána fyrir bensínstöðvar N1 og búið að bæta litum þjóðfánans inn, í anda þeirrar vakningar sem varð eftir bankahrunið í haust. Fánaveifurnar á forsetabílnum koma héðan og líka IDOL-fánarnir. Flestir viðskiptavinir eru fyrirtæki hinumegin á landinu og því er helsta áhyggjuefnið að unnt sé að flytja vörurnar eftir þjóðvegum, sem hægt gengur að byggja upp. En þau eru bjartsýn þrátt fyrir kreppu.








Fleiri fréttir

Sjá meira


×