Hörður bað Geir afsökunar

Hörður Torfason, einn af forsvarsmönnum Radda fólksins, kom afsökunarbeiðni sinni á framfæri við aðstoðarmann Geirs H. Haarde, formanns Sjálfstæðisflokksins, í morgun vegna orða sem hann lét falla í gær. Þetta kom fram í upphafi 16. fundar Radda fólksins sem hófst á Austurvelli klukkan 15.

Hörður hefur verið gagnrýndur fyrir ummæli sem hann lét falla eftir að Geir tilkynnti um veikindi sín á blaðamannfundi í Valhöll í gærdag.

Hörður sagðist óska Geirs bata og styrks í erfiðum veikindum. Jafnframt sendi hann Ingibjörgu Sólrúnu Gísladóttur, formanni Samfylkingarinnar, hugheilar baráttukveðjur vegna veikinda hennar. ,,Það er döpur staðreynd að tveir að valdamestu mönnum þjóðarinnar séu veikir."