Ísland reist við í Mývatnssveit í dag

Mótmælafundur verður haldin í annað sinn í Mývatnssveit í dag og beinast mótmælin að sömu atriðum og á Ísafirði, Akureyri, Egilsstöðum og Austurvelli, að fram kemur i tilkynningu. Krafist er afsagnar ríkisstjórnar, bankastjóra Seðlabankans og forstjóra Fjármálaeftirlitsins. ,,Fjöldi mótmælenda eða stærð byggðarlags skiptir hér ekki máli. Raddir fólksins þurfa að heyrast sem víðast."

,,Í upphafi fundar verður stutt ávarp. Þar á eftir munu fundarmenn sameinast og reisa táknmynd af föllnu íslandi frá jörðu og koma sterkari stoðum undir landið á ný. Þetta er táknræn athöfn. Fyrst þarf að reisa landið við og að því búnu er hægt að fara að vinna að bættu og réttlátara þjóðfélagi með nýtt fólk í fararbroddi," segir í tilkynningu.

Þá gefst fundarmönnum tækifæri til að tjá sig í ræðu eða á hvern þann hátt sem hver og einn kýs. Þá gefst fólki tækifæri til að íhuga ástandið í þjóðfélaginu, þjappa sér saman og senda frá sér jákvæða orku til uppbyggingar betra samfélags.

Mótmælt verður á Hallarflötinni í Dimmuborgum klukkan 15 í dag.