Fagnar frekar en að syrgja MJ

Páll Óskar Hjálmtýsson ætlar að fagna lífi og list Michaels Jackson á Nasa á laugardagskvöld. Til þess hefur hann fengið með sér hljómsveitina Jagúar, Alan Jones og Seth Sharp auk Yesmine og danshóps hennar. Allur ágóði kvöldsins rennur til Barnaspítala Hringsins, en miðaverð er 2.000 krónur.

„Mig langar að gera þetta fyrir Michael Jackson. Ég held að þetta sé rétta leiðin til að fagna lífi og starfi þessa manns. Þetta verður svolítið eins og mexíkósk jarðarför, þar sem lífi er fagnað frekar en að fólk drekki sér í sorg og sút,“ segir Páll.

„Þessi maður var svo drekkhlaðinn hæfileikum og það var svo mikið líf, bara ísöngröddinni hans. Hann var einn af þeim fáu sem tókst að færa þetta líf úr söngröddinni og yfir í skrokkinn í dönsunum sínum. Allar aðrar poppstjörnur líta út eins og viðvaningar við hliðina á honum.“ Þá segir Páll hann brautryðjanda hvað varðar upptökur, útsetningar, tónlistarmyndbönd og umgjörð tónleika.

Plötur Jacksons voru áberandi á unglingsárum Páls. „Ég tengdi best við Off the Wall-plötuna. Svo toppaði hann sjálfan sig á Thriller, og Bad var pottþétt leið til að fylgja henni eftir. Svo fer að síga á ógæfuhliðina þegar menningarfyrirbærið Michael Jackson er orðið stærra en manneskjan.“

Páll segir Jackson alltaf hafa verið lítið barn. „Ég er þeirrar trúar að hann hafi ekki stundað kynlíf. Réttargeðlæknirinn sem tók viðtöl við hann 1995 skilaði inn skýrslu þess efnis að Michael hefði þroska á við tíu ára barn. Fólk furðar sig stundum á því í hverju snilldin fólst, en við megum ekki gleyma því að það eru til tíu ára börn sem eru músíkséní. Hann var séní strax sex ára.“