Blikar hafa aldrei unnið í Grindavík - breyta þeir því í kvöld?

Blikar sækja Grindvíkinga heim í 11. umferð Pepsi-deild karla og eiga þar möguleika á að gera það sem engu Breiðabliksliðið hefur tekist í efstu deild sem er að koma með þrjú stig til baka úr Grindavík.

Þetta verður áttundi leikur liðanna í efstu deild í Grindavík, Grindavík hefur unnið fimm leikjanna og tveimur hefur lokið með jafntefli.

Grindvíkingum hefur reyndar gengið einstaklega vel með Blikanna í undanförnum leikjum því þeir hafa ekki tapað leik í efstu deild á móti Kópavogsliðinu síðan árið 1999.

Grindavíkurliðið hefur ennfremur skorað tvö mörk eða fleiri í undanförnum átta leikjum liðanna í efstu deild og samtals skorað 28 mörk hjá Blikum í þessum leikjum liðanna frá og með sumrinu 2000. Þetta gera 3,5 mörk að meðaltali í leik.