Þjóðarhagur ætti frekar að opna nýja verslunarkeðju

Ef Þjóðarhagur er að hugsa um hagsmuni neytenda ættu þeir frekar að opna nýja verslanakeðju en að reyna að kaupa Haga, segir Ólafur Magnússon, framkvæmdastjóri Mjólku. Það væri heppilegra fyrir neytendur og markaðinn í heild að fá nýja aðila inn.

Ólafur fagnar því að fram sé kominn hópur sem hafi áhuga á matvörumarkaði. Hann spyr af hverju menn sem hafi svona mikla peninga og telji sig geta keypt Haga fari ekki í samkeppni og verslanir. Nú sé nægilegt framboð af ódýru verslunarhúsnæði.

„Ef menn eru að hugsa um hagsmuni neytenda þá hefur það í gegnum tíðina verið þannig þegar að nýir aðilar koma á markaðinn þá verður aukinn og virk samkeppni. Þetta sannaðist þegar að Pálmi opnaði Hagkaup á sínum tíma og þegar Bónus kom fram," segir Ólafur.

„Ef menn eru að hugsa um hagsmuni neytenda og telja að Jóhannes og Hagamenn hafi brotið á neytendum þá í sjálfu sér þurfa menn ekki að óttast annað en að neytendur muni greiða atkvæði með fótunum og fara með viðskipta sín til nýrra aðila," segir Ólafur. Framleiðendur muni fagna nýjum aðilum á matvörumarkaði.