Alþingi sitji fram að mánaðamótum

Jóhanna Sigurðardóttir forsætisráðherra gerir enn ráð fyrir að Alþingi sitji fram að mánaðamótum, þótt tilkynnt verði um þingrof í næstu viku. Ríkisstjórnin samþykkti á fundi sínum í morgun tillögur í atvinnumálum sem iðanaðarráðherra mun kynna síðar í dag.

Forsætisráðherra vildi ekki tilgreina nánar á eftir ríkisstjórnarfund í morgun hvaða tillögur það eru sem iðnaðarráðherra mun kynna síðar í dag í atvinnumálum. Á blaðamannafundi hennar og fjármálaráðherra á þriðjudag boðuðu ráðherrarnir að síðustu tvö stóru frumvörp ríkisstjórnarinnar yrðu væntanlega afgreidd út úr ríkisstjórn á fundinum í morgun.

Þingmenn halda umboði sínu þrátt fyrir þingrof

,,Það liggur yfir og hefur legið fyrir lengi að kosningar verða 25. apríl," sagði Jóhanna. Einungis eigi eftir að tilkynna það formlega með þingrofi.

Jafnframt minnti Jóhanna á að þingmenn héldu umboði sínu eftir tilkynningu um þingrof og þing gæti því starfað eftir tilkynningu um kjördag. En hún mun væntanlega gera það á Alþingi á fimmtudag í næstu viku, þegar 45 dagar eru til kjördags.

,,Ég vona að við getum klára einhvern tíma undir mánaðamótin." Jóhanna sagði það fari eftir því hvað þingið þurfi langan tíma til að afgreiða mál og nefndi sem dæmi frumvarp um stjórnlagaþing og aðgerðir til að aðstoða heimilin í landinu.