Leggur fram frumvarp um eignaumsýslufélög

Fjármálaráðherra leggur væntanlega í næstu viku fram frumvarp um eignaumsýslufélag, sem getur tekið stærstu fyrirtæki landsins sem eiga í fjárhagsörðugleikum tímabundið yfir á meðan verið er að byggja þau upp.

Sænskur sérfræðingur ríkisstjórnarinnar í bankahruni, Mats Josefsson, hefur lagt til við ríkisstjórnina að hún stofni sérstakt eignaumsýslufélag sem tæki yfir 10 til 15 stærstu fyrirtæki landsins í vanda og stýrði uppbyggingu þeirra. Steingrímur J. Sigfússon fjármálaráðherra reiknar með kynna frumvarp um þetta félag í ríkisstjórn í næstu viku. Hann vilji þó ekki nefna neinn fjölda fyrirtækja í þessum efnum.

Mats Josefsson sagði á fréttamannafundi hinn 11. febrúar að hann teldi að bankarnir réðu ekki við að reisa við stærstu fyrirtækin og mikilvægt væri að endurreisn þeirra væri gagnsæ og jafnræðis gætt í meðhöndlun fyrirtækjanna. Nú eru mörg stærstu fyrirtæki landsins í vanda og bankarnir hafa ráðist í að reisa sum þeirra við eins og Árvakur.

Fjármálráðherra segir að ríkið gæti hinsvegar þurft að koma að sem umsýsluaðili eigna í þjóðhagslega mikilvægum fyrirtækjum um stund og þá kæmi þetta félag til sögunnar. En sænski sérfræðingurinn lagði mikla áherslu á gagnsæið, sem kvartað hefur verið undan að skorti hjá bönkunum.