Segja Helguvík geta stytt kreppuna

Smíði kerskálanna hófst síðastliðið haust en eftir að heimskreppan skall á var dregið úr framkvæmdahraða og starfa nú um eitthundrað manns við verkefnið. Sextíu prósenta verðlækkun á áli hefur ekki dregið kjarkinn úr eigendum Norðuráls.

Ragnar Guðmundsson, forstjóri Norðuráls, segir þá staðreynd að framkvæmdir séu í gangi vera besta vitnisburðinn um að menn hafi fullan hug á að halda þessu verkefni áfram. Vonir séu um að álverð hækki á næstunni þannig að menn séu að horfa fram í tímann.

Gengislækkun krónunnar hefur lækkað innlendan kostnað og heimskreppan hefur gert erlend aðföng til smíðinnar ódýrari. Þannig hefur stálverð lækkað verulega og verkefnaskortur eykur líkur á hagstæðari tilboðum frá verktökum.

"Verkefnið ætti því að vera ódýrara við þessar aðstæður sem núna eru, ef mönnum tekst að fjármagna það," segir Ragnar.

En þar stendur hnífurinn í kúnni. Norðurál bíður þess nú að Alþingi staðfesti fjárfestingarsamning vegna Helguvíkur. Ragnar segir hann hafa gríðarlega þýðingu við þær aðstæður sem nú séu uppi í heiminum. Álit Íslands hafi beðið verulegan hnekki í alþjóðafjármálaheiminum. Fjárfestingarsamningurinn sé einn af lykilþáttunum í því að tryggja fjármagn frá erlendum bönkum við þessar aðstæður.

HS Orka, áður Hitaveita Suðurnesja, vonast til að fá lán frá sömu bönkum vegna tengdra virkjana. Júlíus Jónsson forstjóri segir allt hanga á staðfestingu Alþingis og borin von sé að Norðurál fái fyrirgreiðslu frá erlendu bönkunum án hennar.

Stefnt er að því að fyrstu álhleifarnir komi úr kerskálunum eftir tvö og hálft ár. Það þýðir að framkvæmdir, meðal annars við virkjanir, þurfa að vera komnar á fulla ferð í haust.

Júlíus segir að fyrir efnahag landsmanna geti Helguvíkurverkefnið orðið vendipunktur. Það ætti að geta stytt kreppuna talsvert og flýtt fyrir því að við komumst virkilega af stað upp á við aftur.