Tugir Vítisengla væntanlegir í dag

Vítisenglar frá öllum Norðurlöndunum og víðar munu reyna að komast inn í landið í dag þrátt fyrir hert landamæraeftirlit samkvæmt heimildum Vísis. Um er að ræða tugi Vítsengla víða um heim. Meðal annars munu Vítisenglarnir koma frá Þýskalandi, Frakklandi, Sviss, Bretlandi og nokkrir frá Bandaríkjunum auk Norðurlandanna. Þeir fyrstu munu koma hingað með flugi um hádegisbilið og er búist við að þeir síðustu munu lenda á Íslandi um miðnætti.

Mikill viðbúnaður er vegna málsins en í gær gaf dómsmálaráðuneytið út tilskipun um að víkja frá Schengen-eftirlitinu tímabundið og taka upp landamæraeftirlit. Það þýðir þeir sem koma hingað til lands þurfa að sýna vegabréf þó þeir séu frá aðildarríkjum Schengen.

Forsprakki vélhjólaklúbbsins Fáfnis, JónTrausti Lúthersson, sagði í viðtali við Vísi í gær að honum þættu viðbrögð yfirvalda öfgakennd. Ástæðan fyrir hertu landamæraeftiriti er fyrst og fremst vegna innflutningsveislu sem Fáfnir mun halda annað kvöld í Hafnarfirði. Þeir hafa í tilefni þess boðið öllum aðildarfélögum Vítisenglanna að koma í veisluna.

Í yfirlýsingu frá dómsmálaráðuneytinu segir að litið sé á atburðinn sem ógnun við allsherjarreglu og þjóðaröryggi.