Móttökugleði ári fyrir kosningarnar 2006

Ári fyrir borgarstjórnarkosningarnar 2006 stóðu forsvarsmenn R-listans fyrir fleiri móttökum á kostnað borgarstjórnar en á meðalári. Kosið var til borgarstjórnar 27. maí 2006 og voru haldnar 112 móttökur ári fyrir kosningarnar. Á tímabilinu 2004 til 2008 voru að meðaltali haldnar 91 móttökur á ári hverju.

Skrifstofa borgarstjóra tók nýverið saman lista yfir þær móttökur sem haldnar voru á vegum borgarstjórnar Reykjavíkur frá 1. janúar 2004 og fram til 15. febrúar 2009. Fram hefur komið að móttökur voru haldnar að meðaltali fjórða hvern dag á kostnað borgarbúa.

Í reglum um opinberar móttökur á vegum borgarinnar segir að gestgjafar í slíkum móttökum séu borgarstjóri, forseti borgarstjórnar, formaður borgarráðs og staðgenglar þeirra. Ári fyrir borgarstjórnarkosningarnar 2006 voru Steinunn Valdís Óskarsdóttir borgarstjóri, Árni Þór Sigurðsson forseti borgarstjórnar og Stefán Jón Hafstein formaður borgarráðs.

Ári eftir að fyrri meirihluti sjálfstæðismanna og framsóknarmanna tók við 13. júní 2006 voru haldnar 86 móttökur á kostnað almennings.

Árið 2004 voru 86 móttökur haldnar á vegum borgarstjórnar, 97 ári seinna og 103 móttökur voru haldnar bæði 2006 og 2007. Móttökunum fækkaði árið 2008 niður í 69. Það sem af er ári hafa fimm móttökur verið haldnar á vegum borgarstjórnar.