SA gætu sagt upp kjarasamningum

Svartsýni gætir hjá aðilum vinnumarkaðarins um hvort það takist að koma á þeirri stöðugleikasátt sem stefnt er að í viðræðum þeirra við ríkisvaldið. Heimildir fréttastofunnar úr viðræðuhópi Alþýðusambandins og Samtaka atvinnulífsins herma að töluverðar líkur séu á að Samtök atvinnulífsins segi upp núgildandi kjarasamingi fyrir mánaðamót, en þá rennur út frestur til að segja samningunum upp.

Aðilar vinnumarkaðrins eru orðnir óþolinmóðir að bíða eftir stefnumörkun og framtíðarsýn um uppbyggingu efnahagslífsins frá stjórnvöldum. Þar er helst þrýst á að stjórnvöld ljúki viðræðum við lífeyrissjóðina um fjármögnun einkaframkvæmda til að halda uppi atvinnustiginu og gefa innspýtingu í atvinnulífið. Lífyeirssjóðirnir hafa lýst sig reiðubúna til að fjármagna stórframkvæmdir, en ríkisvaldið hefur ekki sett fram lista yfir þær framkvæmdir sem hægt væri að fara í.

Þar eru menn að hugsa til byggingu hátæknisjúkrahúss, lagningu Sundabrautar, Vaðlaheiðargöng og tvöföldun Hvalfjarðarganga. Allt séu þetta mannaflsfrekar aðgerðir sem séu vel til þess fallnar að vera á höndum einkaaðila. En ríkisstjórnin hefur enn ekki greint frá áformum sínum í þessum efnum, þótt leiðtogar stjórnarflokkanna hafi tekið jákvætt í hugmydir um aðkomu lífeyrissjóðanna að fjármögnun slíkra framkvæmda.

Það er mat heimildarmanna fréttastofunnar í hópi aðila vinnumarkaðarins, að þær efnahagsráðstafanir sem stjórnvöld hafa þegar mælt fyrir á Alþingi ættu að duga peningamálanefnd Seðlabankans til lækkunar vaxta, en án lækkunar stýrivaxta hafa forystumenn Samtaka atvinnulífsins sagt að launahækkanir komi ekki til greina og þar með yrði gildandi kjarasamningum sagt upp. Forysta Alþýðusambandins hefur á móti lagt áherslu á að laun verðu hækkuð til leiðréttingar við verðlagsþróun og ákvæði kjarasamninga um hækkun launa sem frestað var í febrúar síðast liðnum fram í júlí.