Is it true? vinsælasta lagið í Svíþjóð

Framlag Íslendinga í Eurovision, Is it true? er í fyrsta sæti á netlistanum Itunes í Svíþjóð og í öðru sæti á sama lista í Finnlandi. Það þýðir að lagið er oftast halað niður á netinu í viðkomandi löndum.

Milljónir nota Itunes í veröldinni. Þar af hundruðir þúsunda í Svíþjóð. Sænski lagahöfundurinn er þegar búinn að bjóða Óskari að koma til Svíþjóðar að semja tónlist fyrir sænsku júróvisjón keppnina.

Vísir náði tali af höfundi lagsins, Óskari Páli Sveinssyni á flugvellinum í Kaupmannahöfn. Hann sagðist vera þreyttur eftir ótrúlegt ævintýri.

„Maður er eiginlega enn þá að átta sig á þessu. Þetta er að síast hægt og rólega inn en þetta var mjög óraunverulegt í græna herberginu í gær," segir Óskar Páll sem er dálítið vantrúaður á eigin velgengi enn sem komið er.

„Í fyrstu var ég frekar áhyggjufullur. Fyrstu tvær þjóðirnar gáfu okkur engin stig þannig ég hugsaði: jæja, lendir maður þá bara í sextánda sætinu," segir Óskar sem óttaðist að úrslitin færu mun verr en raunin varð.

Hann segist hafa tekið gleði sína á ný þegar stigin tóku að hrúgast inn.

Aðspurður hvaða þýðingu sigurinn hafi fyrir hann svarar Óskar: „Þetta lag verður spilað og kynnt víða. Það er til að mynda á toppnum á Itunes-listanum í Svíþjóð. Ég vissi það reyndar ekki fyrr en sænski lagahöfundurinn óskaði mér til hamingju með það."

Sænski lagahöfundurinn varð reyndar svo heillaður af framlagi Óskars að hann bauð honum að koma til Svíþjóðar og semja júróvisjón framlag til þess að keppa í undankeppninni þar í landi. Það gerði sá spænski einnig.

Sjálfur segir Óskar Páll að hann taki öllu slíku með ró - það eina sem hann þrái núna sé hvíld.

„Við höfum ekki fengið að hvílast mikið hérna úti þannig ég geri ráð fyrir því að ég muni sofa í tvo daga þegar ég get," segir Óskar með þreytulegri röddu.

Óskar Páll og Jóhann Guðrún auk föruneytis munu lenda á Leifsstöð upp úr þrjú í dag.