Innlent

Skjálftinn mældist 4,7 á richter - stöðugir eftirskjálftar

Mynd/www.vedur.is
Jarðskjálftinn, sem átti upptök sín um 8 kílómetra norðaustur af Grindavík, var af stærðinni 4,7 á richter, segir Gunnar Guðmundsson jarðskjálftafræðingur hjá Veðurstofu Íslands. Hann segir að skjálftinn hafi fundist víða, meðal annars í Borgarfirði. Skjálftinn varð klukkan 21:33.

Fyrstu tölur bentu til þess að skjálftinn væri 3,9 og síðar 4,5 á richter. Gunnar telur að skjálftinn hafi verið á 6-7 kílómetra dýpi.

Frá því að stóri skjálftinn reið yfir hafa verið stöðugir eftirskjálftar og á Gunnar von á því að það verði þannig frameftir nóttu. Þeir hafa allir verið mun minni en sá stóri.

Fjölskyldufaðir í Grindavík sagði í samtali við fréttastofu að skjálftarnir hefðu verið afar snarpir og hann hefði þurft að hafa sig allan við svo sjónvarp myndi ekki enda á stofugólfinu. Hann sagði fjölskyldunni verulega brugðið og að í fyrstu virðist ekki hafa orðið skemmdir á á heimilinu.








Tengdar fréttir

Á annað hundrað eftirskjálftar

Gunnar B. Guðmundsson, jarðskjálftafræðingur hjá Veðurstofu Íslands, segir að á annað hundrað eftirskjálftar hafi fylgt jarðskjálftanum sem varð klukkan rúmlega hálftíu í kvöld norðaustur af Grindavík. Þeir stærstu hafa verið um 3 stig á richter en stóri skjálftinn var 4,7 stig.

Líklega um eðlilegar jarðskorpuhreyfingar að ræða

Allstór jarðskjálfti varð á svæði um 11 kílómetra suðvestur af Hafnarfirði klukkan 21:33 í kvöld. Skjálftinn varð nánast undir Reykjanesbraut nálægt Kúgerði, segir Sigurður Þ. Ragnarsson jarðeðlisfræðingur. Fyrstu tölur bentu til að hann væri 3,9 á Richter en endurreiknaðar tölur Evrópsku jarðskjálftamiðstöðvarinnar benda til þess að hann hafi verið 4,8 á Richter og á um tveggja kílómetra dýpi, segir Sigurður.

Íbúi í Grindavík: Hélt að um Suðurlandsskjálfta væri að ræða

Sigmar Eðvarðsson, bæjarfulltrúi í Grindavík, segir jarðskjálftann sem varð klukkan rúmlega hálftíu í kvöld hafa staðið í 4 til 5 sekúndur. Ár er liðið frá Suðurlandsskjálftanum og segir Sigmar að hann hafi í fyrstu talið að um annan slíkan skjálfta hafi verið ræða. Hann hafi ekki áttað sig ekki á því að upptök skjálftans væru í grennd við bæinn.

Lögreglu ekki borist tilkynningar um tjón

Lögreglunni á Suðurnesjum hefur ekki borist neinar tilkynningar um tjón vegna jarðskjálftann sem varð klukkan hálf tíu í kvöld norðvestan af Grindavík.

Mest lesið


Fleiri fréttir

Sjá meira


×

Mest lesið