Sakar bæjarfulltrúa um óheiðarleika

Formaður Bæjarráðs Vestmannaeyja, Páley Borgþórsdóttir, segir í grein sem birtist á Eyjar.net, að hana blöskri óheiðarleiki oddvita V-listans. Ástæðan fyrir skrifum Páleyjar eru átök sem hafa verið innan bæjarstjórnar vegna mannaráðningar í Íþróttamiðstöð Vestmannaeyjar.

Þá var eiginmaður Páleyjar ráðinn sem forstöðumaður íþróttamiðstöðvarinnar en einnig var faðir bæjarstjóra Vestmannaeyja, Elliða Vignissonar, ráðinn sem umsjónarmaður íþróttahússins.

V-listinn gagnrýndi mannaráðningarnar harðlega og vildu meina að annarsvegar hefðu Páley og Elliði átt að víkja af fundum þar sem málin voru rædd og skoðuð. Þá kom fram í bókun að V-listinn stæði í þeirri trú að bæjarstjórn væri að sniðganga bæjarsamþykktir varðandi ráðningar yfirmanna og kallaði á faglega verkferla varðandi mannaráðningar.

Í viðtali við Vísi fyrr í vikunni hafnaði Elliði ásökunum V-listans alfarið og sagði forstöðumann Íþróttamiðstöðvarinnar alls ekki yfirmann og því ætti bæjarsamþykktin ekki við. Þá kom einnig fram að nöfn venslamanna höfðu verið lögð fram til kynningar á bæjarráðsfundi. Þar af leiðandi hafi bæjarfulltrúunum ekki verið skylt að víkja af fundi.

Í pistli sínum ræðst Páley harkalega á oddvita V-listans og sakar hann um óheiðarleg vinnubrögð og tornæmi á fundarsköp.

„[...] [S]íðar kom svo fram ásökun í fjölmiðlum frá Páli Scheving um að við höfum hugsanlega brotið lög með því að víkja ekki sæti þegar ráðningarnar voru ræddar og samþykktar. Er það svo að Páll Scheving áttar sig ekki á því hvort mál eru til kynningar eða ákvörðunar eða er það svo að hann er óheiðarlegur og segir ekki satt og rétt frá?" segir Páley að lokum.