Kastaðist ekki út úr bílnum á Grindavíkurvegi

Í frétt Stöðvar 2 og Vísis frá því í gær sem fjallaði um banaslys á Grindavíkurvegi var sagt að ökumaður annars bílsins hefði slasast talsvert þegar hann kastaðist út úr bílnum við áreksturinn, þar sem hann hafi ekki verið í öryggisbelti. Valdimar Leó Friðriksson framkvæmdarstjóri Landssambands slökkviliðs- og sjúkraflutningamanna segir þetta ekki rétt. Hið rétta sé að báðir mennirnir hafi verið klipptir út úr bifreiðunum.

Valdimar var beðinn um að koma þessari leiðréttingu á framfæri. Auk þess var því haldið fram samkvæmt heimildum fréttastofu að annar bíllinn hafi verið á öfugum vegarhelmingi þegar slysið varð. Valdimar segist efast um að þessar heimildir séu réttar þar sem óvíst sé á hvorum vegarhelmingi bíllinn var.

„Slökkviliðs- og sjúkraflutningamenn í LSS starfa við að koma að svona viðburðum. Hér er um viðkvæm mál að ræða og er þeim mjög í mun að fréttaflutningur af þessum viðburðum sé réttur," segir í bréfi frá Valdimari.

Fréttastofa tekur undir þessi orð og reynir eftir fremsta megni að vanda vel til verka í sínum fréttaflutningi. Fyrrnefndar athugasemdir eru teknar til greina og leiðréttist þetta hér með.