Mál og menning undirbýr brottför

Starfsfólk bókabúðar Máls og menningar á Laugavegi 18 býr sig nú undir að yfirgefa húsnæðið sem verslunin hefur verið í síðan 1961. Að óbreyttu hættir verslunin þar í ágúst.

„Já, við erum aðeins farin að taka til inni á lager og erum að svipast um eftir nýju húsnæði,“ segir Elsa María Ólafsdóttir verslunarstjóri.

Eigandi hússins, Kaupangur, hefur krafist hærri leigu eftir að ríkið tók yfir rekstur búðarinnar. „Og við getum ekki verið með svo háa álagningu á bækur,“ segir Elsa.

Hún viti ekki hvað komi í stað verslunarinnar.

„Kannski á að opna nýtt diskótek, vantar ekki fleiri þannig við Laugaveg?“ spyr hún. Þetta sé áfall fyrir miðborgina. Elsa segist þó halda í vonina, að takist að semja við Kaupangur. Eigandi Kaupangs vill ekki ræða við fjölmiðla, enda er enn verið að semja.

Hanna Birna Kristjánsdóttir borgarstjóri segist vona að búðin, eins og aðrar verslanir við Laugaveginn, geti verið þar áfram. „Ég efast þó um að borgin geti haft aðkomu að þessu máli,“ segir hún.

Dagur B. Eggertsson, oddviti minnihlutans í borgarstjórn, segir erfitt að benda á mikilvægari verslun á Laugavegi. „Við munum kalla eftir heildaryfirliti um þessi mál í borgarráði til að sjá hvort borgin geti komið að þessu.“ 

Borgarráð fundar í dag.