Forráðamenn Notts County töluðu við Mancini

Stjórnarformaðurinn Peter Trembling hjá enska d-deildarfélaginu Notts County viðurkennir í viðtali við Nottingham Evening Post í dag að félagið hafi fundað með knattspyrnustjóranum Roberto Mancini um möguleikann á að Ítalinn tæki að sér knattspyrnustjórn Notts County.

Svíinn Hans Backe var síðar ráðinn en Trembling kveðst hafa heillast mjög af Mancini.

„Við Sven Göran Eriksson hittum Mancini og hann er frábær maður og mjög góður knattspyrnustjóri. Eftir á að hugsa þá held ég samt að við höfum ráðið réttann mann í starfið. Mancini er það stórt nafn að hann hefði fengið svo mikla fjölmiðlaathygli að hann hefði örugglega ekki fengið frið til þess að vinna vinnu sína," er haft eftir Tembling.