Norsk flugsveit til gæslustarfa

Utanríkismál Þrjár norskar F16-orrustuþotur ásamt um 40 manna fylgdarliði munu stunda æfingar og sinna loftrýmisgæslu hér við land næstu tvær vikur.

Þoturnar komu hingað til lands seinnipart dags í gær, segir Friðrik Jónsson, sviðsstjóri hjá Varnarmálastofnun. Spánverjar hættu nýverið við að senda flugsveit hingað til lands vegna kostnaðar og mun norska flugsveitin koma í þeirra stað.

Friðrik segir kostnaðinn við komu flugsveitarinnar verða á bilinu sex til átta milljónir króna. Von er á bandarískri flugsveit til loftrýmisgæslu í haust.

Samkvæmt heimildum Fréttablaðsins stóð upphaflega til að samhliða komu flugsveitarinnar kæmi hingað til lands kynningarhópur á vegum norskra hernaðaryfirvalda. Hann átti að kynna íslenskum ungmennum möguleikann á að ganga í norska herinn og hvetja þau til að sækja um.

Ekki hafa fengist skýringar á því hvers vegna var hætt við þann hluta heimsóknarinnar. Heimildir Fréttablaðsins herma að sú ákvörðun hafi verið tekin einhliða af norskum hernaðaryfirvöldum, án þrýstings frá íslenskum stjórnvöldum.- bj