Framsóknarþingmaður: Stendur ekki á okkur

Eygló Harðardóttir, þingmaður Framsóknarflokksins, segir að ekki standi á Framsóknarflokknum við afgreiðslu á frumvörpum og þingsályktunum ríkisstjórnarinnar á Alþingi. Þannig svarar hún orðum Birgis Ármannssonar sem fullyrti í dag að af 30 frumvörpum og þingsályktunartillögum sem hefðu verið afgreidd frá ríkisstjórninni hefðu aðeins 16 verið lögð fram á þingi. Velti Birgir fram þeirri spurningu hvort málin lægju óafgreidd í þingflokkum stjórnarflokkanna eða hvort samningar við Framsóknarflokkinn tækju svona langan tíma.

„Ég get fullyrt að þetta snýr ekki að samningum við okkur. Öllum er frjálst að leggja fram frumvörp og þingsályktunartillögur og munum við framsóknarmenn að sjálfsögðu styðja öll góð mál og reyna að vinna að þeim innan þingsins. Þess vegna höfum við einmitt verið að kalla eftir frumvörpum og þingsályktunartillögum frá stjórnarflokkunum sem tengjast hagsmunum atvinnulífs og heimila," segir Eygló.

Hún spyr hvort hið sama gildi ekki um Sjálfstæðisflokkinn. „Að þeir séu tilbúnir að leggja fram sín eigin mál til að bæta hag heimilanna eða fyrirtækjanna í staðinn fyrir að tuða bara?"