Byltingarforingi blæs til tónleika

Tónlistarmaðurinn Hörður Torfason, sem síðustu mánuðina hefur verið þekktastur fyrir að fara fyrir svokallaðri Búsáhaldarbyltingu sem hlaust af bankahruninu, blæs til árlegra Kertaljósatónleika í Borgarleikhúsinu þann 10. mars næstkomandi.

Hörður segist í samtali við fréttastofu vera búinn að halda Kertaljósatónleikana í um 30 ár og haldið sig við leikhúsið undanfarin ár en áður verið í Íslensku óperunni. Hann segir þó að gestirnir séu síður en svo alltaf þeir sömu. „Þetta er ekki alltaf sama fólkið, síður en svo," segir Hörður sem segist yfirleitt hafa fyllt leikhúsið á þessum tónleikum sínum. Ungt fólk hafi verið áberandi að undanförnu.

Í auglýsingu um tónleikana sem birtist á miði.is segir að plötur Harðar Torfa skipti orðið tugum og söngvar hans hundruðum og marga þeirra megi flokka sem „þjóðareign".