Atvinnusvæði rýmt á Ísafirði

Veðurstofan í samráði við lögreglustjórann á Vestfjörðum hefur lýst yfir hættustigi á Ísafirði vegna reits 9 (Grænigarður og Netagerðin) og er rýming í gangi. Á svæðinu er atvinnustarfsemi og hefur lögreglan þegar haft samband og er starfsfólk á leið úr vinnu. Þetta kemur fram í tilkynningu frá Sýslumanninum á Ísafirði.

Ennfremur er viðbúnaður vegna starfsmanna í húsnæði Orkubús Vestfjarða og vegna íbúa á Geirastöðum. Orkubúið er staðsett í fjallsrótinni, ekki langt frá þar sem snjóflóð féllu í gær á Hesthúsagerði. Að sögn sýslumanns hefur verið haft samband við starfsmennina og íbúa Geirstaða og þeir beðnir um að hafa varann á. Að mati yfirvalda er þó ekki ástæða til þess að rýma þar að svo stöddu.

Þá beinir lögreglustjóri því til fólks að vera ekki á ferðinni að óþörfu og þurfi það að sinna brýnum erindum að hafa sérstakan vara á sér á svæðum þar sem að vitað er að snjóflóð hafa fallið. Um klukkan hálf átta í morgun féll lítið snjóflóð að stálþili í Eyrarhlíð og uppúr klukkan átta féll snjóflóð yfir Hnífsdalsveginn. Það flóð mun hafa verið þunnt.