Greenpeace segja engan markað fyrir hvalkjöt í Japan

Náttúruverndarsamtökin Greenpeace stóðu í dag fyrir blaðamannafundi á hafnarbakkanum í Reykjavík en samtökin eru hér á landi til þess að kynna fyrir stjórnvöldum skýrslu sem unnin hefur verið um möguleika Íslendinga til þess að selja hvalkjöt til Japans.

Í skýrslunni segir meðal annars að lítill sem enginn markaður er fyrir hvalkjöt í Japan, en þetta hafa samtökin eftir forstöðumanni innflutningsfyrirtækisins Asian Trading Company. Fyrirtækið hefur verið aðalkaupandi afurða Hvals hf. í Japan. Forstöðumaðurinn segir að fyrir­tækið ætli ekki að flytja inn hvalkjöt frá Íslandi í ár. Þetta kemur fram í upptöku af símasamtali milli manns frá Greenpeace og forstöðumannsins frá því 7. maí, sem Fréttablaðið greindi frá í morgun.

Í samtalinu segir forstöðu­maður­inn að Japanar borði lítið sem ekkert hvalkjöt lengur og unga fólkið sé afhuga því. Neysla á hvalkjöti er um 4.000 tonn árlega í Japan segir forstöðumaðurinn og telur þá með neyslu á höfrungum. Kristján Loftsson, framkvæmdastjóri Hvals, segir að ætlunin sé að selja langreyðarnar sem veiðast á þessu ári til Japans í gegnum Asian Trading. Um 150 langreyðar á að veiða, sem gera a.m.k. um 6.000 tonn.