Samfylking óskar skýringa á launabreytingum

Samfylkingin hefur sent borgarstjóra og mannauðsstjóra Reykjavíkurborgar bréf og óskað skýringa á framgöngu við uppsagnir fastlaunasamninga og launalækkun hjá starfsfólki borgarinnar sem áformaðar eru.

„Engar upplýsingar hafa hins vegar verið lagðar fram í borgarráði eða aðgerðarhópi borgarráðs um þetta verklag," segir Dagur B. Eggertsson, oddviti Samfylkingarinnar. „Borgarstjóri gaf skýrar yfirlýsingar um náið samráð við stéttarfélög og starfsfólk við afgreiðslu fjárhagsáætlunar fyrir mánuði síðan."

Efni bréfs Samfylkingarinnar fer hér á eftir:

„Óskað er skýringa á því sem fram hefur komið í fréttum, að starfsfólk hafi fengið nær engan frest, jafnvel niður í einn dag, til að bregðast við óskum borgarstjóra um lækkun launa og/eða yfirvinnu með breyttum launasamningum.

Minnt er á að við afgreiðslu fjárhagsáæltunar voru höfð uppi stór orð um að unnið yrði í samræmi við tillögu Samfylkingarinnar og Vinstri grænna um náið samráð við starfsfólk og stéttarfélög þeirra við útfærslu á öllum næstu skrefum sem lúta að niðurskurði og starfskjörum hjá Reykjavíkurborg.

Ekkert hefur verið lagt fram um ofangreint vinnulag í borgarráði eða aðgerðarhópi borgarráðs en einsog kunnugt er hefur aðgerðarhópur ekki einu sinni verið kallaður saman í þessum mánuði hvað þá að borgarráði hafi verið gerð grein fyrir málinu."