Íslenskur friðargæsluliði til starfa í Palestínu

Ólöf Magnúsdóttir, fulltrúi Íslensku friðargæslunnar, heldur um helgina til starfa í Palestínu í tveggja mánaða verkefni hjá Barnahjálp Sameinuðu þjóðanna, UNICEF. Í tilkynningu frá utanríkisráðuneytinu segir að Ólöf mun aðstoða staðarskrifstofu Barnahjálparinnar við að miðla upplýsingum um aðstæður barna á átakasvæðum Palestínu og neyðaraðstoð þeim til handa.

„Starfið felst m.a. í því að vinna úr upplýsingum sem berast frá staðarráðnum starfsmönnum og miðla til höfuðstöðva og framlagaþjóða Barnahjálparinnar í tengslum við væntanlega neyðaraðstoð,“ segir í tilkynningunni.

Annar Íslendingur, Guðmundur E. Birgisson sálfræðingur, starfar á vegum friðargæslunnar hjá sömu skrifstofu að eftirliti með barnaverndarmálum.

Þessu til viðbótar eru fjórir fulltrúar á vegum friðargæslunnar í Mið-Austurlöndum sem allir vinna hjá undirstofnunum Sameinuðu þjóðanna meðal annars að málefnum palestínskra og íraskra flóttamanna.