Reginhneyksli verði hætt við hvalveiðarnar

Einar K. Guðfinnsson, starfandi sjávarútvegs- og landbúnaðarráðherra, telur að það væri reginhneyksli ef minnihlutastjórn Samfylkingar og Vinstri grænna ákveði að breyta ákvörðun hans em heimilar hvalveiðar. Þetta kom fram í fyrirspurnartíma fráfarandi ráðherra sjálfstæðismanna á fundi þeirra á Grand hótel í dag.

Minnihlutastjórnin myndi þannig ganga gegn vilja meirihluta Alþingis. Fyrir liggur að Sjálfstæðisflokkur og Framsóknarflokkur vilja heimila hvalveiðar, að mati Einars.

Mistök að stokka ekki upp í stjórninni

Þorgerður Katrín Gunnarsdóttir, varaformaður flokksins og starfandi menntamálaráðherra, sagði að það hafi verið mistök að gera ekki breytingar á ríkisstjórninni fyrir áramót. Skiljanalega hafi Geir H. Haarde, formaður flokksins, viljað taka tillit til veikinda Ingibjargar Sólrúnar Gísladóttur, formanns Samfylkingarinnar, og þar af leiðandi hafi breytingum á ráðherraskipan verið slegið á frest.