Björg staðfestir boðið í dómsmálaráðuneytið

Björgu Thorarensen var boðið sæti dómsmálaráðherra í væntanlegri ríkisstjórn Samfylkingarinnar og Vinstri hreyfingarinnar - græns framboðs. Björg staðfesti þetta við fréttastofu nú undir kvöld. Hún vildi að öðru leyti ekkert láta hafa eftir sér um þetta mál að svo stöddu.

Í morgun var búist við því að ný ríkisstjórn yrði kynnt áður en dagur yrði að kvöldi kominn. Nú virðist málið vera í einhverri upplausn því að fulltrúar Framsóknarflokksins hafa sagt að þeir búist ekki við því að stjórnarskiptin geti átt sér stað fyrr en á mánudag.

Björg er prófessor í lögfræði og forseti lagadeildar. Helstu rannsóknarsvið hennar eru stjórnskipunarréttur, alþjóðlegar mannréttindareglur og þjóðaréttur. Björg er gift Markúsi Sigurbjörnssyni hæstaréttardómara.