Lúðvík Lúðvíksson, sem er í framboði til formanns hjá VR segir ummæli Gunnar Páls Pálsonar formanns VR varla svara verð og dæma sig sjálf. Vísar hann þeim alfarið á bug. Lúðvík er að vitna til viðtals sem birtist við Gunnar Pál í fréttum Stöðvar 2 þar sem hann velti því upp hvort upplýsingum úr Kaupþingi hefði verið lekið úr bankanum til þess að hafa áhrif á formannskjörið.
„Þetta er fráleitt og mjög dapurlegt af formanni VR sem er rétt tæplega 28.000 þúsund mannafélag að vera með slíkar dylgjur," segir Lúðvík. „Það er aftur á móti mjög raunarlegt að hann telji að það sé betra að fólk sjái ekki þessar upplýsingar og sérstaklega ekki félagar mínir í VR. Það er nokkuð ljóst að formaður VR er komin í nauðvörn því nú verða það almennir VR félagar sem kjósa og þá vandast málið því ekki var almennum félagsmanni boðið í jólahlaðboðið góða."
Lúðvík segist viss um að niðurstaðan í formannskjörinu verði önnur þegar hinum almenna félagsmanni gefst kostur á að kjósa. „Það veit Gunnar Páll vel og óttast að missa stól sinn. Nú sjá allir almennir félagsmenn að VR verður ekki stjórnað lengur við háborðið í Kaupþing og raunveruleg verkalýðsbarátta verður bara háð með raunverulegum félagsmönnum VR."
Lúðvík segist að lokum harma „hvert okkar góða félag VR er komið og skora ég á formann VR að segja af sér til að valda félaginu ekki meiri skaða en orðin er. Vil ég að lokum þakka þeim ca 5% félagsmanna sem ég er nú þegar búin að heimsækja fyrir frábærar móttökur og stuðning en mér er það ljóst að formaður VR verður að vera meðal sinna félagsmanna og þar á formaður VR bara að vera."
