Hjúkrunarfræðingar vara við sparnaðaraðgerðum

Stjórn Félags íslenskra hjúkrunarfræðinga varar við afleiðingum þeirra sparnaðaraðgerða sem boðaðar hafa verið hjá Heilsugæslu höfuðborgarsvæðisins. Í ályktun stjórnarinnar segir að öflugt starf hafi verið byggst upp á þremur heilsuverndarsviðum en það eru miðstöð heilsuverndar barna, miðstöð mæðraverndar og miðstöð tannverndar.

Sérþekking heilbrigðisstarfsmanna á snemmgreiningu og meðferðum hefur lagt grunn að heilbrigði barna og fjölskyldna í landinu og er sú þekking til að mynda einn af lykilþáttum þess að draga úr heilsupillandi áhrifum þeirra aðstæðna sem íslenskt samfélag býr við í dag, að mati stjórnar Félags íslenskra hjúkrunarfræðinga.

„Hætta er á að boðaður niðurskurður muni draga úr gæðum forvarnarstarfs heilsugæslunnar sem mun auka kostnað á öðrum sviðum heilbrigðiskerfisins þegar fram líða stundir," segir í ályktuninni.