Nýr mengunarvarnarbúnaður kynntur

Norska varðskipið Harstad er nú hér á landi í boði Landhelgisgæslunnar. Skipið er nánast systurskip íslenska varðskipsins Þórs sem er í smíðum í Chile. Í morgun hefur farið fram kynning á nýjum mengunarvarnarbúnaði sem er svipaður þeim sem verið er að setja í Þór. Mengunarvarnarbúnaðurinn er sannkölluð bylting þegar kemur að því að dæla olíu úr sjó.

Norskir kynntu búnaðinn fyrir umhverfisstofnun, landhelgisgæslunni, Olíufélögunum og fjölmiðlum í morgun. Búnaðurinn virkar þannig að þegar upp kemur olía í sjó er sett upp sérstök flotgirðing en síðan eru sérstakar dælur notaðar til þess að dæla olíunni í sérstaka tanka sem eru um borð í skipinu.

Um er að ræða mikla breytingu varðandi mengunarvarnir á sjó. Kynningin fór fram úti fyrir Reykjavíkruhöfn í morgun og er hluti af stærri æfingu sem fer fram eftir hádegið í dag. Þá fer fram sameiginleg þyrluæfing norsku og íslensku gæslunnar.