Tæplega 7.000 manns eru fluttir af landi brott

Fyrstu 9 mánuði ársins hafa 6.762 einstaklingar flutt af landi brott. Þar af eru ríflega helmingur með íslenskt ríkisfang eða 3.475 einstaklingar. Ef þróun fram að áramótum verður með sambærilegum hætti mun þetta þýða að samtals fjöldi einstaklinga sem flyst frá Íslandi árið 2009 er mjög svipaður og árið 2008.

Í tilkynningu frá Creditinfo um málið segir að munurinn á milli ára muni þó felast í því að þetta árið flytjast hlutfallslega mun fleiri Íslendingar til útlanda í samanburði við árið í fyrra því þá voru 64% brottfluttra einstaklingar sem eru af erlendu bergi brotin.

Að því gefnu að þróun brottflutninga verði óbreytt út árið 2009 má því gera ráð fyrir að heildarfjöldi einstaklinga sem flytjast úr landi verði ríflega 9 þúsund manns og þar af verði íslenskir ríkisborgarar um helmingur.

Flestir einstaklingar með erlent ríkisfang hafa flust til Póllands. Ef aðeins eru skoðuð þau lönd sem Íslendingar eru að flytjast til má sjá að þar eru Norðurlöndin vinsælust. Flestir hafa þá farið til Danmerkur, næstflestir til Noregs en í þriðja sæti er Svíþjóð.

Hér er athyglisverðast að sjá aukningu flutninga til Noregs en þangað hafa nú þegar 1.042 einstaklingar flutt á árinu til samanburðar við 278 talsins allt árið í fyrra. Á fyrstu 9 mánuðum ársins jukust því flutningar Íslendinga til Noregs um 275%.

Creditinfo mælir sýnilegar afleiður fjárhagserfiðleika og brottflutninga úr landi og á það sérstaklega við um þau tilvik þar sem flutningar eru í kjölfar atvinnumissis. Creditinfo hefur þó ekki upplýsingar um hve margir af þeim sem flust hafa úr landi eru skráðir á atvinnuleysiskrá hér.