Fólkið sem skapar sýndarheim Spaugstofunnar

Spaugstofan er vinsælasti sjónvarpsþáttur landsins eins og undanfarin ár. Þátturinn hefur smám saman tekið breytingum; gömlu grínararnir eru farnir að notast við nýjustu tækni til að fríska upp á sjóið. Að baki sýndarheimi Spaugstofunnar eru þau Ólöf Erla Einarsdóttir og Sigurður Bragason.

„Ég er búinn að vinna með Spaugstofunni í fimm ár og það hefur aldrei verið eins mikið af grafík og síðustu tvö ár,“ segir hönnuðurinn Ólöf Erla Einarsdóttir.

Ólöf Erla og Sigurður Bragason hanna sýndarheim Spaugstofunnar sem virðist stækka með hverju árinu. Í síðasta þætti voru grínistarnir til að mynda sendir út í geim þar sem risavaxið geimskip gleypti þá með húð og hári. Þættirnir eru unnir frá miðvikudegi til föstudags og Ólöf segir að það sé gríðarleg keyrsla. „En þetta er rosalega gaman og við gerum aldrei það sama,“ segir hún. „Við höfum gert heilu teiknimyndirnar á einum degi. En þetta reddast alltaf og við náum alltaf að klára þetta á góðum tíma.“

Spaugarinn Karl Ágúst Úlfsson staðfestir að sýndarheimur Spaugstofunnar stækki með hverri þáttaröðinni. „Eftir því sem tækninni fleygir fram verður auðveldara að gera þetta,“ segir hann og bætir við að vinnslutími Spaugstofunnar hafi alltaf verið knappur. „Við gerum ýtrustu kröfur til allra deilda. Það eru allir að vinna ofurmannlegt starf í hverri viku, en nú erum við komnir með þekkingu og tækni til að gera flóknari hluti á þessum skamma tíma. Það hefur þróast þannig að kröfurnar halda áfram að vera miklar. Við ráðum við flóknari hluti á þessum stutta tíma.“

atlifannar@frettabladid.is