Eygló vill leiða Framsókn í Suðurkjördæmi

Eygló Harðardóttir, þingmaður Framsóknarflokksins, hefur ákveðið að sækjast eftir fyrsta sæti á lista flokksins í Suðurkjördæmi í komandi þingkosningum. Þetta tilkynnir hún á heimasíðu sinni í kvöld.

Eygló tók sæti á Alþingi í nóvember í fyrra þegar Guðni Ágústsson, fyrrverandi formaður Framsóknarflokksins, hvarf úr stjórnmálum. Þá var Eygló kjörin ritari flokksins á flokksþingi í síðasta mánuði.

,,Gríðarlega stór verkefni eru framundan við að verja heimilin og fyrirtækin í landinu svo halda megi uppi því velferðarríki sem Framsóknarflokkurinn hefur átt þátt í að byggja. Hugmyndafræði framsóknarmanna um samvinnu, samstöðu og sanngirni verður lykilþáttur í úrlausn þeirra. Þessari hugmyndafræði hef ég haldið á lofti í mínu stjórnmálastarfi hingað til og mun gera áfram sem leiðtogi framsóknarmanna í Suðurkjördæmi," segir Eygló á heimasíðu sinni.

Auk Eyglóar situr Helga Sigrún Harðardóttir nú á þingi fyrir Framsóknarflokkinn í Suðurkjördæmi.