Heimdallur ósáttur með ríkisstjórn Jóhönnu

Heimdallur, félag ungra sjálfstæðismanna í Reykjavík, lýsir yfir vonbrigðum með nýja minnihlutastjórn Samfylkingar og Vinstri grænna. Félagið telur ríkisstjórnina ekki vera þjóðinni til heilla.

„Vænlegra hefði verið að allir flokkar hefðu tekið sig saman og myndað þjóðstjórn sem starfaði fram að kosningum. Þannig hefði myndast friður í samfélaginu og ráðrúm til þess að glíma við þau marvíslegu vandamál sem blasa við þjóðinni. Það er því áfall að vinstri flokkarnir hafni þessu og myndi minnihlutastjórn. Félagið hefur þungar áhyggjur af útgjaldaþenslu og skattahækkunum sem ný ríkisstjórn mun freistast til þess að ráðast í," segir í ályktun félagsins.

Heimdallur gerir þær kröfur til ríkisstjórnarinnar að ekki verði vikið frá aðgerðaáætlun Alþjóðagjaldeyrissjóðsins, fjárútlátum ríkisins verði stillt í hóf, skattar verði ekki hækkaðir umfram það sem fjárlög ársins 2009 gera ráð fyrir, ekki verði settur á hátekjuskattur og fjármagnstekjuskattur verði ekki hækkaður, ekki verði vikið frá framfaraskrefum sem stigin hafa verið í heilbrigðismálum og varlega verði farið í breytingar á stjórnarskrá.