Banaslys af völdum svefns við akstur

Umferðarstofa vill ítreka þau skilaboð sem fram komu í auglýsingaherferðinni 15 sem sýnd var í fyrra, en nafn herferðarinnar vísar til þess að ekki þarf nema 15 mínútna svefn til að koma í veg fyrir slys af völdum svefns og þreytu. Talið er að svefn og þreyta sé fjórða algengasta örsök alvarlegra umferðarslysa á Íslandi.

Komin er út skýrsla Rannsóknarnefndar umferðarslysa um banaslys sem varð á Suðurlandsvegi við Hvammsveg 11. apríl 2008. Í skýrslunni kemur fram að aðalorsök slysins var sú að ökumaður sofnaði undir stýri eftir veikindi og langvarandi vökur og leiddi það til þessa slys þar sem ökumaður bifreiðar sem kom úr gagnstæðri átt lét lífið.

Á árunum 1998 til 2006 urðu 10 banaslys af völdum þess að ökumaður sofnaði undir stýri og í þeim létust 16 manns. Í þessum tilfellum leiddi rannsókn það í ljós að aðal orsök slysins var það að ökumaður sofnaði við akstur.

„Ökumenn eru hvattir til að fara inn á heimasíðuna www.15.is. Þar er ýmis fróðleikur um hvernig best er að koma í veg fyrir að sofna við akstur sem og hverjir séu í mestri áhættu,“ segir í tilkynningu Einari Magnúsi Magnússyni upplýsingafulltrúa Umferðarstofu.